MAKPELA dia anaran’ny fasam-pianakaviana Andriamanantena, ao Anjanahary. Ao daholo ny razam-be sy ny taranany no matory, miandry ny fitsanganana amin’ny maty, araka ny finoana kristianina.

Ao anatin’ny Baiboly kosa (Genesisy 23: 17) dia toerana misy zohy (lava-bato) io Makpela io, ao Hebron, ary ao no milevina i Abrahama sy ny taranany.

Raha ny eto Madagasikara, ny taona 2008 no nandao antsika i Georges Andriamanantena fantatra amin’ny anarana hoe RADO, mpanoratra. Nialoha azy, tamin’ny taona 2002, ny rahalahiny, Célestin Andriamanantena, mpanao gazety ary rain’i Fanja Andriamanantena, mpamoron-kira sy mpihira tsy zoviana amin’ny rehetra.

Tamin’ity taona 2016 ity kosa no lasa nanaraka an’i RADO ny vadiny, rehefa nivahiny 91 taona teto amin’ity tany fandalovana ity. Tsy iza izany fa i Edwige teraka Ravololona. Ny fandevenana moa dia io hitanareo eo amin’ny ferapara.

Araka ilay tonon-kira noforonin’i RADO ihany dia : « Tsy ho takatry ny saiko izay rehetra alahatrao ; ny angatahiko anao ry Raiko, aoka aho atoky Anao ».

Izahay eto aminy madagate.org dia maneho fiaraha-miory amin’ny fianakavian’i Edwige sy Rado Andriamanantena. Mandrià am-piadanana ianareo mivady.

Aza avela hahalala ny antony nanaovanao
Ny hariva mamanala na ireo maraina vao.

Tsy ho takatry ny saiko zay rehetra alahatrao.
Ny angatahako ry Raiko, aoka aho hatoky Anao.

Aza avela hanontany ny hafaliana atolotrao,
Na ny anton’ny tomany efa hitako hatrizao.

Aza avelanao hanefy ny ampitso zay Anao.
Aza avelanao handrefy zay ho fitantananao.

Rado (Georges Andriamanantena)

Jeannot Ramambazafy – 22 Febroary 2016