BIANCO sy ny FANABEAZANA
Andriamatoa RATOVOSON Benjamin, mitana micro
Mpianatra 208 ao amin’ny kilasy voalohany eny amin’ny ENAM-Androhibe no niatrika ny atrik’asa fanentanana nataon’ny BIANCO (“Bureau indépendant anti-corruption”), mahakasika ny ady amin’ny kolikoly, io maraina io teny amin’ny foiben’ny ENAM eny Androhibe. Tafiditra ao amin’ny fandaharan’asam-panabeazana ataon’ny BIANCO izao, ary efa atao isan-taona. Tanjona ny hanan’ireto mpianatra ireto ny toe-tsaina manda kolikoly, sy mandàla ny fahitsiana ary ny fahamarinana, ka hiasa madio rehefa eny amperin’asa.
Ireto mpianatra ireto tokoa mantsy dia hofanina ho tonga mpiasam-panjakana ambony rahampitso ka tokony hanana toetra mendrika mifanandrify amin’izany. “Mino izahay BIANCO fa noho ny fahaizanareo no nahatonga anareo eto amin’ity toerana ity. Faniriana ny aha olom-banonana anareo ka ho mpiasam-panjakana ambony mendrika ny fahatokisan’ny vahoaka” hoy ny fanamarihana nataon’ny talem-paritry ny BIANCO eto Antananarivo, Andriamatoa RATOVOSON Benjamin. Fotoana ihany koa nanentanan’ny BIANCO ireto mpianatra ireto mba hifanome tànana hiady amin’ny kolikoly satria andraikitrin’ny daholobe izany.
Tafiditra ao amin’ny taranja hianaran’izy ireo rahateo ny “Fanjakana tsara-tantana sy fitantanana madio” (“Etat de Droit et Bonne gouvernance”). Novoaboasana tamin’izy ireo ny karazana kolikoly misy sy ny fomba fisehony eny amin’ny sehatra isan’ambaratongany avy. Tsy nihonona fotsiny tamin’ny famelabelaran-kevitra moa ny fihaonana androany fa nisy ihany koa ny fotoana nahafan’ireo mpianatra nametraka fanontaniana tamin’ireo tompon’andraikitrin’ny BIANCO nitarika ny fotoana. Teo ihany koa ny fanentanana nataon’ireo solontenan’ny “Réseau d’Honnêteté et d’Intègrité”n’ny Lycéem-panjakana eto Antananarivo ho an’ireto zokiny eny amin’ny ENAM ireto.
Nahaliana ny mpianatra ny famelabelaran-kevitra natao. Tsiahivina moa fa ny alatsinainy teo ny fanombohan’ny fampianarana tamin’ny fomba ofisialy.
Nirina Zafimaharo
Sampandraharahan'ny Serasera - BIANCO