Raha toa ny fisianao eto an-tany (« Ton Existence ») ka toa loharanon'ireo olana tsy misy farany, dia raiso ho sedra izany hampatanjaka anao kokoa.
ManĂ na finoana fa mbola ho avy ny tsara indrindra. Ny fisianao akory tsy natao hampiaiky volana izao tontolo izao velively. Ny fisianao dia ny mba hiainanao ny fiainanao amin'ny fomba izay hahasambatra anao indrindra.
Ny tsara indrindra eo amin’ny tenanao dia tsy natao tarigetra ho tratrarina, fa toe-javatra tokony hiainana sy hampiarina ampahibemaso.
Tokana ny safidinao : na ataonao fotoana feno tranga mampahonena ny fiainana raha toa ka lavinao ny kiakiaka miala avy ao anatinao, na ny mifanohitra amin'izany ka hovanao ho asa zavakanto faran’izay tsara indrindra.
Samy eo am-pelatanantsika tsirairay ny safidy. Matetika isika dia manao fahadisoana. Ka aiza ny marina ary aiza ny lainga?
Ny fifandraisan'ny samy olombelona dia tsy manome toromarika momban’ny fampiasana azy ; tsy manana rafitra mazava tokony harahina fa dia mitsapatsapa fotsiny ihany isika, manandrakandrana fotsiny, miantehitra amin'ny sain-tsika mazana mamorona na maminavina. Tsy tena marina daholo anefa ny hitranga na koa everina fa maharesy lahatra anao sy ny hafa. Hisy foana ny singa tsy azo antoka - na inona na inona ataontsika dia mijanona ho misitery ho anao sy ho an’ny hafa ny fisianao- ka tsy ho fantatrao mihitsy hoe iza marina no eo anoloanao.
Ny fisiantsika dia natao maha misy antsika fa tsy natao hitarafana ny Fisiana, na miaina mba hiainana, ary tsy hijery ny tenantsika miaina.
Isika olombelona rehetra dia nateraka ho tia. Io no fototra sy fiafaran’ny Fisiana. Mampitolagaga ihany anefa ny toetran-dRaolombelona miezaka miampanga ny hafa ho nanimba ny fiainany, ny fisiany, kanefa ny tenany ihany no nanimba ny fiainany sy mandrava ny fisiany, ary tsy ilainy olon-kafa mihitsy izany.
Tsy miandry ny fisiantsika ny fotoana fa miaraka aminy hatrany mba hisiana tondro-zotra arahina.
Voafetra ny fotoanantsika eto amin’ity tany fandalovana ity.
Aoka tsy ho lany andro sy fotoana hiaina fiainana tsy anao velively fa fisehoana fotsiny ihany.
Aoka isika tsy hanidy ny tenantsika ao anatina dogma (foto-pinoana), dia hiaina araka ny fihevitry ny hafa. Ny fisiana, ny fiainana manontolo dia tolona hatrany ary ny fiainana -izay misy anao- dia efa fandresena maharitra.
Ny fototry ny fisiana manontolo dia miala avy amin’ny sandan’ny fitiavana :
"Lazao amiko ny fitiavanao dia holazaiko aminao hoe iza ianao".
Rehefa mandinika ny fisiantsika isika dia tsy ny fahafatesana no mampitahotra fa ny fiainana.
“Ny fiainana tsy misy fitiavana, na inona na inona ananan’ny olona iray, dia fiainana foana sy tsy misy tanjona".
Dia arahabaina daholo isika zanakolombelona miisa 8 miliara mahery maneran-tany, nahatratra ity 24 Desambra 2024, andro nahaterahan’ny Jesosy Kristy !
Jeannot RAMAMBAZAFY
Nadika avy tamina hevitr’olombelona maro ary koa niala avy amina fandinihana lalina nataon’olona iray niangavy tsy ho tonon’anarana. Misaotra azy isika.