Antananarivo, 22 Aogositra 2025. Nodimandry androany, teny amin’ny hopitaly miaramila (HOMI) ao Soavinandriana, Ramatoa Céline Ratsiraka, teraka Velonjara, vady navelan’ny Filoha teo aloha Didier Ignace Ratsiraka, teo amin’ny faha-87 taonany, araka ny tatitry ny fianakaviany. 87 taona izy.
Nanambady an’i Didier Ratsiraka izy tamin’ny taona 1964, ary niditra teo amin’ny sehatry ny politika izy rehefa lasa Filoham-pirenena ny vadiny tamin’ny taona 1975. Ramatoa Céline Velonjara Ratsiraka no Première Dame teto Madagasikara ny taona 1975 ka hatramin’ny taona 1993, ary ny taona 1997 ka hatramin’ny taona 2002.
Nandritra ny fe-potoam-piasan’ny vadiny dia tena navitrika teo amin’ny sehatra sosialy Ramatoa Céline Ratsiraka. Izy no tena vy sy angady nanana tamin’ny fananganana ivon-toeram-pitaizana zaza tsy ampy taona, ny "akanin-jaza" (“crèches”), any amin'ny faritra maro manerana ny Nosy. Izany dia mba hokarakaraina ny zaza mandritra ny fiasan'ny reny. Niarahany tamin’ny rahavaviny, Hortense Velonjara Raveloson Mahasampo, ny fananganana ny sampana “Vehivavy” tao amin’ny antoko Arema, dia ny “Vehivavy Arema” ("Arema Women") izay navitrika tokoa.
Mandria am-piadanana, Maman Céline.
Jeannot Ramambazafy sy ny ekipan’ny madagate.org