Augustin Andriamananoro dia Filoha lefitra nasionalin'ny MAPAR (Miaraka amin'ny Prezidà Andry Rajoelina). Fanambarana mikasika ny fanendrena ny Praiminisitra voalohan'ny Repoblika malagasy faha-IV.
« Mazava moa iny, ny fanambarana ny didy izay navoakan’ny Fitsarana Avo momban’ny Lalampanorenena (Ttf: HCC), manazava ilay andininy faha-54, hoe: ny maro an’isa eo anivon’ny Antenimiera dia izay nànana ny Depiote maro an’isa indrindra ary niforona tao anatin’ny fandrotsahana ireo antonta taratasy nametrahana azy ho olom-boafidy.
Ny MAPAR izany ankehitriny no tompon’ny maro an’isa. Rehefa manolotra io Praiminisitra io ny MAPAR dia tsy maintsy jerena daholo izany ny andininy voalazan’ny lalàna mikasika ny fomba fomba mikasika izany fametrahana izany PM izany. Tsy maintsy manara-penitra izany isika.
Ny dikan’izany dia tsy ataotao foana io zavatra io. Madagasikara koa tsy lany olo-manga dia efa misy izany, ankehitriny, ny fampidinihina ary efa fantapantatra ihany hoe iza izay ho olona mifandraika amin’izay hoe iraka ilain’ny firenena hisahana ny andrim-panjakana eo anivon’ny governementa hitantana izany governementa izany.
Dia rehefa mitsangana izany ny ataontsika hoe “groupement parlementaire” dia hanana ny « groupement parlementaire-ny » ny MAPAR, ary izy io izany no hanao sonia ny taratasy amin’ny fomba ofisialy satria tsy maintsy hajain-tsika izany soatoavina mikasika izay fanolorana Praiminisitra izay. Izany hoe: ireo Depiote-ny MAPAR voafidy ao anatin’ny Antenimiera dia ho solontenan’ny “Groupement parlementaire”-ny MAPAR, amin’ny fametrahana izay taratasy izay amin’ny Filohan’ny Repoblika. Ka ny Filohan’ny Repoblika no mankato izay fanendrena izay ».
Noraisin’i Jeannot Ramambazafy